IN VENESSIAN !

Me diverto, ogni tanto, a scriver qualche poesia in dialeto venessian e dopo ghe propongo le me opere a qualche amigo, cussì, par riderghe su. Gnente de serio insoma. . . o almanco gnente che vogia aparir serio. . . .
Uno de sti amissi ( el Piopa, par no far nomi) me ga domandà in che venessian che scrivevo e mi ghe go risposto che tentavo de riprodur la parlata atual, pur savendo che serti soni no ga una scritura corispondente. D'altra parte, se voesse scriver col venessian de Goldoni o dovesse far riferimento a quelo che ze scrito sul Boerio, credo che sarìa come se tuti dovessimo parlar e scriver come Dante e compagnia, parché ze sta lori a inventar el "volgare illustre".
Dove che "volgare" vol proprio dir che la lingua italiana la ga inventada dei ignoranti e la gera cussì bela che Dante ga fato quela strica de rime , scrivendo come ch'el parlava.
In ogni caso mi credo che sia logico parlar come che se pensa. . . E mi penso in venessian !
Se so polemico? Serto che sì ! Sopratuto in famegia! Basta che pensé che i me tre fioi ga sempre parlà dialeto in casa, anca se i gaveva el pare , la mare, la nona paterna, do zie paterne e na zia trovada co tanto de diploma de "insegnante elementare". . . . e adesso mi dovarìa parlarghe in italian a le quatro nevode (bele come el sol) che i ga vùo la bontà de regalarme!

El belo ze che quando che i ragiona co le rispetive mugièr, i parla in dialeto, cussì ste fantoline crede che ghe sia na lingua par barufar e una par parlar co i putei.

Roba da mati!